أنواع الدكاترة فى مصر

السلام عليكم ورحمة الله اخوانى الكرام واعزائى الزوار، انا عارف انى غبت عليكم كتير جدا بس للاسف ظروف خارجة عن ارداتي.. واتمنى انكم تسامحونى :)
اليوم راجعلكم بموضوع جميل وشيق وهو مش طويل بس فى البحث فيه عايز يتكبله كذا مرة ... وهو موضوع عن

انواع الدكاترة فى مصر 

من منظور شركات الأدوية سواء خريج علوم او بيطري او صيدلة واشتغلت فى شركة ادوية لازم تمر بأنواع الدكاترة دي اولهم

الديلر Dealer 

من الاسم كدة يعنى سلم واستلم الموضوع عنده بيزنس اكتر من أي شىء تانى هيوعدك بأنه هيكتبلك العلاج بتاعك لكن بمقابل هكتبلك الف علبة مثلا بس ركبولى تكييف فى العيادة او هاتولى لابتوب او شاشة او موبايل حسب الاتفاق وللأسف دول اقذر انواع الدكاترة لانه ممكن يكتب علاج للمريض مش محتاجه لمجرد انه عامل ديل مع الشركة دى.

دة بتعرفه لما تروح تعرض البرودكت بتاعك ويقولك مافى زيه كتير او طيب وانا هستفيد ايه او تلاقيه مش مهتم اصلا وعايزك تجيب من الاخر او يقولك ايه يفرقه عن المنافسين بتوعه ما كله زي بعضه ساعتها تخش عليه بقى سيبك من المكونات ومن الاخر يا دكتور الشركة بتقدم هدايا للدكاترة اللى بتساعدنا ننجح. ويبداء الشغل القذر للأسف اكتر من 50% من الدكاترة مقضينها بيزنس انا شوفت بنفسي دكتور عظام فى مستشفى جيهان فى اسكندرية كان اسمه ابو حامد تقريبا .. كان بيكتب للمرضي كذا نوع من المرهم اللى بيعمل نفس الشىء (اللى هو ولا حاجه) لمجرد انه عامل كذا ديل مع كذا شركة ودة اكتر واحد ممكن يكتب البرودكت بتاعك لحد ما الديل يخلص ولا هيعرفك بعدها عاوز تانى يبقى تدفع :)
انت كمريض هتعرفه لما تلاقيه كاتبلك كل العلاج من شركة واحدة وغالبا بتبقى شركة مضمورة وساعات يقولك روح الصيدلية اللى تحتى هات العلاج وتعالى وريهولى :) دة كدة ديلر صرف.

العلمي - scientific 

النوع دة اكثرهم احتراما لنفسه ولمريضه ولعلمه ومهنته دة بتدخله لو انت شركة بير سلم هيشيعك دة اول ما بتكلمه عن المنتج اللى بتقدمه بيبداء يسألك عن مكوناته وتأثيره وتفاعلاته والمادة الفعالة فيه والتركيزات دة يهمه اوي العلاج وتركيبته بيبقى دكتور شاطر اوى ولو كتبلك هيفضل معاك عمر لحد ما يظهر منافس قوي ليك

الأنا (Ego) 

دة كان دكتور عادي بس اتنفخ بمرور الزمن عاوزك تخش عليه بدخلة انت بابا وانت ماما ومن غيرك احنا ولا حاجه العلم من غيرك هيضلم محتاجين رأي حضرتك القيم فى العلاج المتواضع دة ورأي حضرتك دة بنعتبره شهادة ووسام نعتز بيه هيقولك عارف عارف المهم دة نظامه كدة فلازم تنفخه على قد ما تقدر

دكتور الشعب (public) 

دة دكتور متواضع جدا اهم حاجه عنده سعر العلاج يعني عاوز حاجه فى حدود اتنين جنيه علشان يقدمها للناس هتلاقيه حبوب مع الناس وبيهزر ويضحك معاهم كدة عادي وبياخد شهرة بسرعه عيادته دايما هتلاقيها مكركبة متعرفش ليه

دكتور العينات (samples) 

لاء ماهو مش علشان قولت عينات يبقى دكتور تحاليل! لاء مش دة دة دكتور غالبا لسه صغير وبيحاول يجمع اكبر قدر من العينات المجانيه علشان يوزعها عالمرضي كإسلوب دعاية هتعرفه لما تروحله وتديله عينه من العلاج يقولك لاء انا عاوز كرتونه وهتلاقى عنده كراتين كتيير لشركات تانيه. انت كمريض هتعرفه لما تدخل عيادته هتلاقيها صيدليه.

البصباص 

يا إما شب صغير عايش الدور يا إما عجوز ف سن الضياع مراهقين شوية يعني لو هو دكتور عاوز اللى تروحله تبقى بنت... لاء بصحيح العبارة تبقى مزة وكذلك لو هى دكتورة عاوزة مزوبيبقى تظبيط اكتر ما هو علاج وبتاع وبيتبادلوا الارقام وخروجات بقى وانتوا عارفين الباقى.
كان فى دكتورة بدون ذكر اسماء كانت بتموت فى العضلات الشباب الفورمة وكدة  مع انها كانت فى سن الضياع.

دكتور العالمي 

النوع الاخير فى البوست دة هو مش عالمي ولا حاجه بس مبيكتبش علاج محلى خالص كل روشتاته ادوية مستوردة او لشركات عالمية كبيرة مبيثقش فى الشركات المحليه.

من اقذر المجالات مجال شركات الأدوية بيبيعوا كلام والبيزنس فيها له الكلمة العليا بلا مريض بلا بتاع وللأسف شوفت من الدكاترة الديلر اللى يكرهنى فيهم كلهم. وفي دكاترة محترمة كتييييييير طبعا.
حاجة اخيرا بس متكشفوش عند دكتورة الله يخليكو :)

أعتمد عليك فى مشاركة الموضوع معي ونشر المعرفة لتدعمني وتجعلني أستمر فى طرح مواضيع جديدة

كلمات البحث

انواع الدكاترة فى مصر
انواع الدكاترة عامة
سلبيات الداكاترة